當年今日
關於我們

強政辦公室:陳年AO名冊揭秘煲呔有高危嗜好 - 倔頭進士

蘋果日報 2005/11/21 00:00


進士最近喺櫃底見番一本舊名錄,大家唔好誤會,呢本並唔係黑社會名錄,而係一本AO人名冊。原來,為咗方便AO之間互相認識,政府每年都會出一本名錄,裏面基本上落齊每個AO嘅資料,連每個人嘅嗜好亦包括在內。
由於呢本名錄比較舊,所以包含咗一啲AO出身嘅問責局長嘅資料,連煲呔嘅都有。
政務司司長許仕仁喺名錄中就冇申報任何嗜好,心水清嘅讀者就一定知佢係歌劇迷電影迷啦,不過有AO就話係煲煙至啱。唔知老爺點睇禁煙政策呢?
經濟發展及勞工局局長葉澍堃在名錄裏面又係話喜歡音樂同電影。不過,有AO話葉Sir鍾意唱K、紅酒同食好嘢,所以同商界咁friend。
平叔最愛唔做嘢
政制事務局局長林瑞麟就填咗一抽運動喺嗜好嗰欄,又游水又羽毛球咁,呢個唔使問其他AO,睇佢喺政制改革方面嘅工作態度,應該係潛水至真。
重有幾個人嘅嗜好都幾搞笑,康文署署長王倩儀話佢鍾意游水。嘩!公眾泳池又有紅蟲又有糞便,我諗佢都係游私家泳池多嘞!公務員事務局局長王永平嘅嗜好中有一項叫「DoingNothing」,即係乜都唔做咁解,我諗佢應該將做人嘅座右銘填錯咗喺嗜好呢一欄。
睇到呢度,大家一定想知煲呔嘅嗜好填乜,答案唔係養錦鯉,而係觀鳥喎。我問口痕AO煲呔重有冇觀鳥?佢冇直接回答,不過就話煲呔最近連至愛嘅鏞記燒鵝都唔食,佢話:「咪玩啦,唔驚禽流感咩!」
倔頭進士

傳真︰2623-9278
電郵︰[email protected]