公關小YY轉型成為酒店小YY之後，喺倫敦、紐約著名六星級酒店打工，卒之鳥倦知還，返咗香港打工，喺超豪酒店上班，顛倒日夜，唔怪得公關大姐梁玳寧一早話咗：「咦，女仔做酒店，好難結婚㗎！」玳寧姐人生閱歷豐富，有時聽佢講一句，好過某啲分析師講十句。
遲婚，不婚，係小YY一代嘅人物嘅特徵，好彩香港年輕人（三十歲以下）重肯搵工，肯捱，唔會做日本嘅NEETs一族，父母都冇咁辛苦兼勞氣。小YY一對男女同學係專業人士，各有各忙，拍拖Ｎ年，始終唔想結婚，只係在新界築愛巢同居，既然唔結婚咯，點會生兒育女吖，於是兩小口子養貓、養狗、自得其樂，佢哋得閒就同年齡相若朋友講貓經，講狗經，與上一輩師奶講兒女經，完全唔同。

記者慧結咗婚未，左丁山不甚了了，佢根本係一個貓癡，家裏養咗九隻貓，足夠搞到記者慧神魂顛倒，九隻貓在家內跟出跟入，跟入廚房搵嘢食，食飽就霸佔客廳梳化椅瞓覺，記者慧話佢下一世想做一隻俾人疼惜嘅貓。對得啲貓耐，記者慧索性「訪問」九隻貓，寫咗一本新書，叫做《貓貓幼稚園》，配以大量彩色靚貓、懶貓圖片，呢啲圖片唔係用儍瓜機影嘅噃，係《壹週刊》一位攝影記者傅俊偉嘅專業攝影，呢位攝記非一般人，回歸前憑「蘇格蘭裙裏的秘密」，奪得攝影記者協會及報業公會全年最佳新聞圖片獎（左丁山記得係一個英兵穿蘇格蘭裙在香港會對開嘅紀念碑，黃昏時候下旗，大風一吹，蘇格蘭裙翻起，英兵原來冇着內褲，露出屁股，咁啱俾傅俊偉嘅攝影機捕捉到），呢本書稱為《貓貓幼稚園》，算係傅偉俊作品。左丁山不喜歡養貓養狗，都睇到咭咭笑，覺得啲貓神氣十足，好可愛，記者慧話：「估唔到呢類書都會有市場！」鬼唔係，時代女性鍾意養貓唔生仔女，梗係會買嚟睇吓啦，可憐啲幼稚園教師就驚咁少啤啤出生，佢哋會碰上殺校失業啫。