玩具大王蔡志明孻仔蔡加讚與甄子丹姨仔汪圓圓結婚未夠一年即榮升做父母，汪圓圓昨早在沙田仁安醫院誕下7磅幾B女，母女平安。蔡家上下包括榮升爺爺嫲嫲的蔡志明與蔡李惠莉、蔡加怡，聯同甄子丹、汪詩詩與大女Jasmine、圓圓父母，約下午1時齊齊見傳媒，問到B女幾重，詩詩笑言：「遲啲會講㗎啦，加讚仲喺上面，我哋遲啲會再返嚟。」再問圓圓身體如何，BB似邊個？她表示：「OK啦，佢哋會同你哋講㗎啦。」

B女輪廓似媽咪

蔡志明與太太李惠莉則一身紅噹噹裝束探孫女，蔡太表示加讚做新爹哋好感動：「見咗BB啦，好可愛好靚女，其實應該似媽咪多啲，好靚。」圓圓表妹湛琪清與加讚外婆及蔡加敏夫婦於下午分別現身，加讚外婆坐着輪椅由保鑣陪同，更表示：「圓圓好精神，BB重7磅幾，兩個都似，BB個名由佢爸爸媽媽改，希望佢哋繼續生。」而甄子丹電影公司亦代發喜訊，指B女遺傳了媽媽的甜美輪廓，可愛標致。當第一眼見到女兒時，夫妻二人更感動落淚。此外，張衞健於中午時分現身醫院，得知記者等圓圓生B，他八卦地表示：「汪圓圓個老公係邊個？」當記者告知是蔡加讚時，他補充說：「哦！我以為係高圓圓呀。」
採訪：黃曉妍
攝影：陳俊強