咦，啱啱先到6月，咁快有新iPhone出咩？如果唔係，呢班大叔大媽排隊等咩呢？咪就係等「鳩嗚」囉！等得攰攰哋，搵個地方踎吓先，踎到餓餓哋，剝個雞蛋頂吓肚先！就咁樣，佢哋就由鳩嗚團，變咗做野餐團！邊度咁正？等九龍城嘅陳小姐話你知！

陳小姐喺九龍城啟德道開地產舖接近10年，佢同小記訴苦，話年幾前，附近嘅私人住宅御豪門商場，開始有大陸旅行團來到「鳩嗚」，每次都有近百人，未入到去商場嘅，就唯有喺商場外曬住等，高峰期係每日上晝11點至下晝1點，人多到霸住成條行人路，附近嘅居民同商戶出入都要行出馬路，十分牙煙！

陳小姐最嬲嘅係，班同胞企晒喺舖頭門口，由於佢舖頭出面有個石壆位，夠坐幾個人，結果日日都有一大堆人企喺門口之餘，仲坐埋喺度，舖頭嘅落地玻璃都畀呢幅人牆圍到蚊都飛唔入咁滯，嚴重影響生意「啲客見到你舖頭咁樣都調頭走啦！」

做唔生意都不特止，陳小姐仲要做埋清潔義工，一日洗5、6次地，因為班同胞會邊等邊開餐，「雞蛋殼、蘋果芯、竹簽，咩都有，曱甴螞蟻都走晒入黎！」雖然佢已經喺貼紙，提醒人唔好隨地掉垃圾，但都冇用，「叫過佢哋唔好坐喺度，但過一陣又坐返低！」但係由於舖頭外面係公眾地方，陳小姐都唔知可以向邊度投訴，十分無奈。

你敢爆，我敢獎！ 即Call《蘋果》24小時爆相爆片熱線 ：63836568