噚日三間發鈔銀行公佈新鈔樣，相信唔少人都已經睇過，先唔講設計到底係靚定醜啦，唔知大家有冇發現，其實當中嘅一百蚊紙，即係「紅衫魚」，係用咗粵劇嚟做主題呢？不過原來，呢張一百蚊紙幣嘅設計都有段故。

話說早喺上年年底，各間發鈔銀行已經開始為新鈔做設計工作，喺完成初步工作之後佢哋就向香港嘅幾位粵劇名伶諮詢意見，幾位大老倌睇完之後覺得點解好似唔係咁香港？原來新鈔草圖上一開始用嘅係大陸業餘人士扮唱粵劇，《蘋果》向粵劇名伶羅家英求證，家英哥話：「鈔票係有諮詢過我哋粵劇界，我哋見佢哋最初服裝化妝都唔係咁香港化，所以同佢哋講應該搵番香港人。佢哋都肯聽意見。」

但係到底新鈔上面係邊套劇目呢？事關坊間已經開始覺得如果係「帝女花之香夭」之類嘅悲劇，似乎會唔太吉利咁話。不過家英哥表示鈔票上冇話係邊套劇目，只係一個駙馬一個公主，跟住一生一旦咁，由於自己未睇過，所以唔太清楚。講到鈔票有粵劇元素，家英哥話：「梗係開心啦。」

而八和會館主席汪明荃（阿姐）接受電話訪問表示：「我覺得整體好創新，銀紙變直幅，三間銀行統一五個主題，我哋畀意見粵劇方向，我覺得主題好，都係香港特色，譬如飲茶係香港人日常生活，地質公園原來咁靚，我都未去過。至於粵劇，三間銀行唔同設計，一個係《帝女花》，一個係花旦，一個係才子佳人。」

阿姐指三間銀行為設計諮詢粵劇界：「我同幾個叔父畀意見，根據佢哋提供嘅圖樣，我哋就服裝、穿戴、眼神、造手畀意見，我記得有一個造型比較大陸化，所以提出用廣東粵劇化妝穿戴，佢哋亦都接納咗，因為我哋係香港銀紙，唔係人民幣！其實佢哋都好用心機，喺演藝學院搵人做演員，由家英哥指導甫士，影咗相後再照住畫。」

對於有網民批評中銀嘅花旦鈔票設計似陰司紙，阿姐反駁：「絕對唔似，我覺得咁講唔係咁好，太負面！佢哋真係搵人影完相照畫，我覺得設計好用心，百年之後都要有進步，香港咁多元化，好難得粵劇可以入到銀紙，而且$100係紅色，其實大家鍾意就鍾意，唔鍾意就唔鍾意，言論自由。」

精選娛聞，喺晒《娛果》
http://fb.com/appledailyent