E-Kids今日喺灣仔為周六喺麥花臣場館舉行演唱會進行記者會，好友EO2成員彭懷安專程到場恭賀，另外提攜佢哋入行嘅譚詠麟都錄咗片段打氣，校長話：「人生有好多唔同階段，E-Kids到今時今日竟然再開演唱會，唔知有乜攞出嚟準備畀大家，做人要鍥而不捨先成功。」見到校長勉勵，佢哋都好感觸，特別係阮民安（Tommy）指自己有段時間令校長好失望，一直都想搵個機會道歉。

由冇信心做，到門票賣晒，佢哋笑住話：「如果話有信心先唔正常，今次由唔正常嘅人去攪個唔正常嘅騷，點知負負得正。」今次佢哋講明唔會食老本，會有新歌新舞畀大家睇，至於會否騷肌，佢吔話如果下次有機會開騷先騷。

講到校長嚟唔到會否美中不足？佢哋話：「有少少，咁今次撞啱溫拿澳門開騷，可能係緣份，留畀個天安排。」日前同大肚女友張倚雯(Eva)喺ifc血拼，Tommy指係公司同事幫佢揀衫造形象，問到Eva會否來捧場？佢扮傻話：「邊個Eva？嗰個KOL，佢好多人follow，睇下邀唔邀請到。」