【洪羅拔離世】原先約好赴澳慶祝生日 杜貞貞:前日巧遇,佢精神唔太好
洪羅拔杜貞貞
前亞視藝員洪羅拔今晨離世,好友杜貞貞接受《蘋果》訪問時證實死訊,表示透露剛與洪羅拔姊姊通電話,得悉好友離世噩耗,她說:「今朝9點幾,喺醫院走 。哎!我哋本來聽日約晒10個人,同佢一齊過澳門慶祝生日㗎,都去唔到,佢好想去澳門㗎!」
杜貞貞指前日在尖沙嘴遇上洪羅拔,大家還一起到茶餐廳用膳:「出去整頭髮見到佢,整完頭仲一齊去茶餐廳食嘢。佢係瘦咗,精神唔係太好,但就好過上次見佢時,仲叫好多嘢食。不過當時佢話有啲發冷,話好凍。哎,人生就係咁化學,之前仲喺茶餐廳傾偈。」
後日生日的洪羅拔,原本相約了一班好友到澳門慶生的,杜貞貞說:「喺茶餐廳見佢時,精神唔係太好,我仲擔心禮拜一點去,仲去唔去到,之後再打俾佢問去唔到去到,叫佢唔好勉強,唔舒服就去睇醫生,佢猛話冇事。佢家姐話佢夜晚唔舒服,第二朝送醫。佢一直有肝病,可能惡心。走時家姐有一直陪住,佢哋一家人好close。」
好友吳麗珠跟洪羅拔識於微時,不時聯絡飯局,吳麗珠接受《蘋果》訪問時說表示好唔開心:「我都唔敢煩佢姪女同佢屋企人。」吳麗珠指知道洪羅拔患病後,每晚都會替他祈福,希望他早日康服,去年底才相約見面,吳麗珠說:「當時都好精神。」她又大讚洪羅拔為人,她說:「佢好率直,為人直到不得了,心地好好,有佢出現就有開心,佢係大家開心果,佢講笑話好叻。」