韋斯咸星期一晚主場以2:0擊敗「升班馬」哈特斯菲爾德，今季喺英超開齋贏波，而門將赫特亦都打破魔咒零封對手，之前連續喺22場聯賽失波嘅走勢終於告一段落。

英格蘭門將赫特上季畀曼城外借咗去拖連奴，今季就借去韋斯咸，但佢自從今年1月之後，喺聯賽一直冇再唔失波，今季喺槌仔頭三場英超更加失咗10球，喺聯賽連續失波場數累積到22場。不過，星期一槌仔今季第一次喺主場出擊，赫特終於有表現冇失波，係佢今年第二次喺聯賽保持清白之軀，上一次係1月8號拖連奴以0:0賽和薩斯索羅嘅意甲聯賽。