韋碧克星期日喺阿仙奴作客賽和車路士嘅英超比賽，下半場因為鼠蹊受傷退下火線，阿仙奴方面擔心韋碧克可能需要養傷至少一個月。

英國傳媒報道，韋碧克星期一做咗一次掃瞄檢查，幾乎可以肯定會錯過英格蘭下個月分別對斯洛文尼亞同埋立陶宛嘅最後兩場世界盃外圍賽，等佢星期二再做多一次掃瞄，該可以知道佢需要休戰幾耐，不過阿仙擔心韋碧克要唞至少一個月先可以復出。

2016年曾經因為膝部韌帶受傷而缺陣八個月嘅韋碧克，可能會錯過槍手未來四場比賽，包括星期三對唐卡士打嘅英格蘭聯賽盃、下星期二對西布朗嘅英超聯賽、作客巴迪嘅歐霸盃分組賽同埋再下一場對白禮頓嘅聯賽。