練馬師沈集成前季贏54場，令旗下大部份舊馬的評分偏高，上季仍能夠贏48場，居練馬師榜第五位，成績雖然輕微倒退，但其實表現已屬難能可貴。縱觀上季沈廐的頭馬，當中包含19匹自購馬，總共取得28場頭馬，佔總數百分之五十八。

沈集成幾乎每季都有馬匹能夠多捷，好似前季三捷兼贏得跑馬地百萬挑戰盃的「金滙龍華」，而上季亦有代表作，去年入口的自購馬「四季旺」在港首季上陣已經取得三冠一亞一季一殿，更加曾經在經典一哩賽及經典盃上名，至今累積753萬獎金，評分亦由 66分加至107分，如能保持良好進度，今季跑中距離有力問鼎大賽。

目前沈廐有12匹在港曾出賽但仲未贏過的自購馬，當中有唔少都質素不俗，只是來港後尚未完全適應而已。

現時五歲的「貨如輪轉」，在新西蘭十戰三勝，曾經在北部大馬場愛沙妮贏過兩場，其中2016年4月2日所贏的指標評分65讓賽，季軍Lasarla之後勝出二級賽，賽績水準足以在香港第三班贏馬。

今年3月才在港開操，5月尾初出跑田草1400米，只輸兩個半馬位跑第五，僅距上季曾在三班贏馬的「開心遊戲」一馬位。

之後在季尾再跑三仗，亦輸唔多過五馬位，上季煞科日上陣，再次後上跑第五，衝贏季內贏三班賽的「新力威」。

如此推算，當「貨如輪轉」狀態提升至最佳水平，跑中距離的實力至少值三班頂，現時僅65分好着數，應有兩W在手。

此駒在暑期只唞了十日，7月下旬重新展開操練，近兩周已經有兩課快跳，相信會是沈廐季初搶分的先頭部隊。