【考慮進修神學】Sammi坦言身心皆累：而家都未攰完
蘋果日報 2019/09/03 17:25
許志安鄭秀文乳癌檢查
鄭秀文（Sammi）今日在九龍塘出席抗癌活動，呼籲大家要定期檢查乳房，她透露有親戚患上乳癌第4期，知道抗癌路好辛苦，所以家人的支持很重要，幸好最終可以戰勝。
Sammi受訪時笑指兒時有個迷思，以為乳癌跟乳房大小有關，後來中學有講座，她才得知正確資訊。問她是否一個月檢查一次？Sammi說：「就算唔係一個月一次，沖涼嘅時候，記得都會摸吓，有硬塊就要快啲去處理。」問到老公許志安有沒有替她檢查？Sammi笑說：「呢啲自己沖涼做得㗎喇，同埋男性唔係好知點做，醫生話男性可以做基因測試，未必靠摸吓摸吓。」
對於她早前與安仔、張衞健夫婦及雷頌德夫婦展開歐洲之旅，Sammi表示：「休息吓，之前做演唱會太攰，心身都好攰，其實而家都未攰完，不過心靈係放鬆咗，行程都好開心。」她直言這兩個月仍未想工作，自嘲人生踏入47歲就開始很累：「遲啲做少少電影宣傳，但巡迴演唱會就唔做住，不過12月公司幫我接咗個騷，總之呢兩個月休息吓先，或者報讀神學、心靈學嘅課程。」
提到有網民影到她與安仔甜蜜手蹺手，Sammi說：「手機年代一出，就好難避（鏡頭），大部份網民好友善，除咗偷影嗰啲，一般都會問咗我可唔可以合照，如果嗰日我太肉酸，眉又冇，我會好有禮貌推。」有人指她與安仔好sweet，她說：「落咗班照正常相處，平平淡淡。」問到安仔何時才出來工作？Sammi表示：「留畀佢自己講，凡事都有過程，先整理好自己，點樣面對自己先，我反而完全唔急佢要唔要工作，先修理好自己，靜思己過，重整自己先。」旅行後，感情有否昇華？Sammi說：「自然相處，凡事都有過程。」
採訪：黃曉妍
攝影：林賓尼
攝影：林賓尼
（右圖攝影：林賓尼）
Sammi今日在九龍塘出席抗癌活動。
旅行充電回港的Sammi看起來氣色不錯。
Sammi說自踏入47歲就開始很累，稍後或考慮報讀神學、心靈學嘅課程。