西甲豪門巴塞隆拿1992年擊敗森多利亞，首奪歐冠盃（歐聯前身），今年正值25周年，球會都搞一系列慶祝活動，原本尋晚就係高潮所在，安排咗巴塞名宿同賓菲加名宿喺魯營踢紀念賽，不過好多球迷竟然臨場甩底，搞到坐9萬幾人嘅魯營球場吉位處處，唔知以為做神功戲。

講真呢場紀念賽戲碼都唔算差，巴塞就有哥迪奧拿、史杜捷哥夫、朗奴高文等名宿撐場，賓菲加都由一代葡萄牙攻中雷哥斯達領軍，賽前又為已故教練告魯夫搞紀念活動，雖然比賽踢成0:0，但對「那些年」有回憶嘅球迷，都應該收貨。

巴塞官方公佈呢場紀念賽派咗4萬飛俾會員，亦都有2萬8千幾人入場，不過西班牙傳媒就質疑巴塞呢個數字有水份，唔好話山頂位，甚至連中層靚位嘅嘉賓區，都有好多吉位，入場人數應該1萬人左右。其實巴塞管理層呢幾年轉會操作失敗，高價收購埋柏高艾卡沙、安祖高美斯呢啲廢柴，已經有球迷組織發起示範，今次連紀念賽都搞到一鑊粥，巴塞都真係要反省吓。