「富豪飯堂」福臨門疑似借華人飲食（8272）隻殼上市，雖然由舊年初搞到而家都未完事，但係冇影響佢哋過大海發展嘅大計，聽聞佢哋進駐澳門賭場一事傾到七七八八，好大機會喺一間香港人做老闆嘅大型賭場開分店。

傳進駐港人開嘅賭場

福臨門一直有意去澳門開分店，聽聞唔少賭場都有搵佢哋傾，福臨門因為怕順得哥情失嫂意，所以一直未拍板。
咁都啱嘅，呂志和旗下銀娛（027）、小賭王何猷龍、永利（1128）等幾間酒店都起緊新酒店，除咗賭場，都想搵高檔食肆省靚招牌。
講番華人飲食，公司舊年初向持有福臨門大部份股權嘅項目公司，買入2億元CB，之後向招商證券出售1.95億元CB。公司早前再出售1,250萬美元（9,750萬元）可換股債券（CB）畀現股東Anthony Tang，換股後，佢嘅持股量就會由而家15.14%，增至24.16%，成為第二大股東，次於同樣持有CB嘅招商證券。