【大坑】雨僑前年終於承認同羅力威拍拖，但佢哋公開咗戀情之後，孖咇出入依然好避忌，除咗要戴帽頭耷耷，仲唔敢喺公眾地方十指緊扣，拍拖得嚟好低調。
現年30歲嘅雨僑同細佢一年嘅羅力威感情好穩定，日前佢哋又拍拖去咗大坑食日本拉麵，佢哋呢次又係做帽子情侶，一齊戴漁夫帽出動。當晚約7點幾，佢哋入咗一間拉麵店，仲揀咗窗口位對住坐，雨僑坐低就低頭㩒電話，羅力威就望實女友，及至侍應將食物送上枱，佢哋邊食邊傾偈，好有電視廣告見多幾面嘅老夫妻感覺，佢哋食咗約20分鐘就食飽飽，為咗慳時間，仲call定的士，等的士到咗門口先走人。

男友拎手袋

羅力威離開嘅時候盡晒男友責任，幫女友雨僑拎手袋，佢哋上咗的士即喺後座hea爆，的士火速返咗佢哋土瓜灣翔龍灣愛巢，羅力威畀車錢之餘仲繼續拎手袋，先落車嘅佢又等埋女友落車再幫手閂車門，非常體貼，臨上樓前，佢哋去咗便利店買嘢飲。不過愛得低調嘅佢哋，本來落車時人少少都有拖到實，但突然有街坊出現，佢哋又甩番手，警覺性真係好高。
採訪、攝影：畢紹基、吳耀輝