裕泰興西半山翠麗軒,錄得首宗大手成交,買家係三個外籍機師,共用四千八萬,買入七個單位,平均每呎六千,其中頂層特色戶,呎價超過八千五。佢哋計劃每人住一個,另外四件收租。
翠麗軒餘貨明日內購,獨家代理中記話,收飛二百幾,八成買家外籍,破天荒大比數多過地頭蟲。
個盤咁受老外鍾情,主因位處佢哋最熟悉嘅西半山。絕大部份入飛者,至少做咗呢區租客三年,得知附近有新盤賣,就即時向代理入飛,一半打算轉租為買,其餘打算長線出租。
中原西半山聯席董事李巍話,唔好以為洋人唔了解本地樓市,佢哋睇好個盤位近中區及蘭桂坊,唔憂租,一邊攞公司福利租樓住;另一邊買樓投資,比唔少港人更加精明。
君臨天下加佣促銷
雖然話豪宅市道好,但始終係豪宅,銀碼大,成交量當然唔及中細價樓,為咗推動豪客入市,發展商雞年展開加佣行動,催谷代理落力推銷。
恒隆尖沙嘴君臨天下,原先畀一個至個半佣,噚日就加到兩個。促成單位,額外得樓價半個巴仙獎金,都幾和味。
再度推銷嘅長沙灣郝德傑山,聽聞,佣金由百分之一點二五,加至百分之一點七五。
豪宅價格係咁升,唔少豪客舊年入咗市,喺未有焦點豪宅盤推出之前,惟有靠加佣,增添入市動力。