萬綺雯(蚊蚊)今日喺荃灣出席韓國家電家品品牌活動，穿上一襲白色短裙，大騷42吋長腿。蚊蚊跟一位大腦麻痹患者Tiffany一齊送暖，送出由Tiffany製造嘅cupcake俾現場觀眾，蚊蚊話﹕「接代言品牌方面我向來謹慎，今次做代言人，全因為我哋喺慈善方面嘅想法接近。透過今次嘅合作，佢哋會贊助印製繪本圖書，俾一班有不同障別嘅朋友畫出彩虹，帶出社會共融；佢哋亦承諾送出健康水機到唔同嘅機構，讓更多人受惠。」

自言廚藝不俗嘅蚊蚊，透露近期同老公工作都好忙碌，所以甚少下廚，佢話：「年㡳將與歐陽震華(Bobby)到上海演20場舞台劇《律政笑佳人第一季之紙飛機的天空》，現正忙於對稿，稍後會進行綵排。」蚊蚊話同Bobby合作過拍攝電視劇《東坡家事》，已有一定默契，仲大讚對方喜劇感十足，問到驚唔驚Bobby爆肚？佢話：「其實佢唔係經常爆肚，如果佢要爆肚，佢會同大家商量，我最主要係唔好畀佢引我笑。」