當年今日

隔牆有耳:公民三女將 赤腳拉票 - 李八方

蘋果日報 2008/06/26 00:00


近排香港天氣陰晴不定,噚日朝早天文台更一度發出紅雨警告,公民黨三名已表態出選女將,由黨魁余大狀領軍,同埋陳淑莊Tanya、容詠嫦Amy上陣,風雨不改堅持落區派單張,結果變晒落湯雞,十分狼狽。
風大雨大企街濕透身
噚日係三人第一次齊齊出動派單張,選擇喺中產票倉太古城初試啼聲,風大雨大企喺街上派單張,誠意搭夠,都有唔少人伸手接佢哋張傳單,企街無耐幾人就混身濕透,Tanya索性除埋對鞋,赤腳派單張,相信創香港選舉拉票先河。
公民黨選舉工程啓動,三人同時推出「公民拍檔,理想選擇」嘅競選網站,內容包括三人資料,余大狀大讚兩名黨友唔使多講,Amy自稱有「秋菊」同「小辣椒」外號,就真係唔講唔知嘞。三人聲稱排位未定,而根據網頁三人文章排序,依次係陳淑莊、余若薇及容詠嫦,咁安排有乜玄機,大家可去網址參詳 http://www.civicpartners.hk。