正所謂一不離二,隔一陣叫錯稱謂嘅事又再發生。隨後發問嘅工聯會郭偉强提問外勞問題時,就將娥特稱呼為「林特首」,要工聯會黃國健提醒,話係「鄭特首」先啱,郭偉强惟有以「鄭特首又好,林特首又好」打圓場喇。可惜波波噚日冇到場,唔係可以問吓佢點睇。
噚日嘅答問大會原定12點正就完結,不過主席梁君彥要求娥特留多5分鐘,畀公民黨郭家麒可以問埋,點知郭批評林鄭月娥用每月300港元交通津貼收買人心,更拎住300元現金行前想交畀林鄭,林鄭笑住講「你有行賄之嫌喎」,又否認被收買人心。至於娥特衣着方面,前日一日換三套旗袍嘅娥特,噚日冇再着旗袍登場,反而身穿黑色西裝外套配淺藍色低領衫,再重複搭配噚日都有戴過嘅珍珠項鏈。
李八方