郭生就話「上得呢個台我就同太太講,我要唱番首歌,仲𧅵咗太太成個鐘」,點知太太都話唔准,原因係佢「咁早上到嚟,啲人都未去得洗手間住!」嘩,郭太擺明話郭生唱歌係廁所位,但佢即刻話自己有跟師傅學唱歌,仲唱得唔錯㖭!
其實呢啲都係郭生兩公婆之間耍花槍啦,事關呢場演唱會都係郭太嘅主意。郭生話「太太加入保良局11年,仲係主席,但仲有唔夠三日就卸任」,知道郭太想用保良局主席身份為保良局出最後一分力,所以郭生就搞咗場演唱會啦。據知,今次全體入場莎莎員工都要畀少少門票錢㗎,上下一齊做善事,仲順手幫保良局籌咗200萬㖭。
咁聽唔到郭生唱歌唔緊要,皆因個演唱會好多明星㗎,好似莎莎旗下品牌Suisse Programme亞太區代言人周慧敏、李克勤、草蜢,仲有靚聲王陳潔儀同許廷鏗等等歌手撐場㖭!
李華華
mailto:
[email protected]