天文台預測今晚市民要喺烏雲罅中賞月，個天令人有啲掃興，其實香港今年夏天天氣真係幾好，冇打過一場大風，天文台台長林超英都可以安心放暑假，去咗蒙古擁抱大自然。正所謂「行船跑馬三分險」，呢位天文台首腦喺風吹草低見牛羊嘅大漠草原上策馬奔馳嘅時候，就發生墮馬意外，返嚟之後仲有手尾，近日要喺伊利沙伯醫院做腦部手術處理後遺症，好彩手術成功，𠵱家出咗院喺屋企休養緊。

八方今個月初見過台長，佢當時好語重心長咁講，「人到中年，有啲嘢係唔玩得，就係騎馬嘞。」台長暑假時同太太去蒙古旅遊，老婆話騎馬，咪騎囉，點知策騎之時突然馬失前蹄，成個人拋咗出嚟，跌落地，仲一度昏迷差不多半個鐘頭。
台長話醒番之後，真係好似做戲咁，望住自己張身份證讀出自己個名，然後就自己同自己講，「吓？點解個名咁熟嘅。」當時太太又問佢知唔知老婆個名，台長仲話好彩即時噏得出嚟，否則就可能會衍生其他家庭問題都有排煩。
林超英事後返香港去咗醫院做檢查，醫生話冇即時危險，但係就提醒佢腦部有瘀血，如果唔早啲做手術抽出嚟，第日會有危險。台長於是入院做手術，手術好成功，佢亦已經出院返屋企休養。佢嘅助理台長李本瀅原本輪到佢放大假，突然接到台長請假通知，惟有取消休假暫做替工署理台長。八方噚日搵到李本瀅，佢話天文台成班同事都好關心台長，準備去探吓佢喎。

58歲嘅林超英，03年3月起出任天文台台長，佢亦係世界氣象組織中國香港常任代表。酷愛天文嘅佢，亦會非常關心地球同大自然，佢自97年開始擔任香港觀鳥會會長。林超英可以算係經歷最多風雨嘅台長，市民對佢有唔少批評，最近一單係舊年颱風派比安襲港，8月2日晚至8月3日朝早，派比安對香港帶來狂風暴雨，風力比過去10年嘅8號甚至9號風球都高。林超英以維多利亞港內啓德氣象站，只短暫錄到烈風，所以唔掛8號波。最後，天文台要修訂發出3號同8號風球嘅準則，以後要參考埋其他測風站嘅風速數據。