上星期一，國壽（2628）正式晉身成為恒指成份股，奈何染藍對國壽嘅股價並冇太大幫助，一周仍累跌約3%，網友Kymkym喺《Uwants討論區》呻：「自己養咗大大隻嘅人壽蟹，都唔知放唔放生佢走？23蚊嘅時候受綁，反彈冇走到，睇𠵱家個勢肯定仲會跌落去，自己50%嘅資金都係放喺佢身上，都唔知點算好？」
同為國壽蟹民嘅WaiWai3369，就選擇沽貨離場，「喺26.75元高位入咗，早幾日20.25元忍痛放手」，若果以一手計算，埋單唔見咗6450元。另一國壽苦主小貓兒就繼續堅持，「睇嚟繼續坐艇幾個月，甚至乎1年，曾經諗過買吓輪對沖，減少損失。」而Cool_cyron相信國壽嘅跌勢已經收窄，未來大跌機會唔大，但建議Kymkym不妨喺反彈時先沽一半貨，等公布業績後，先至決定下一步應該點做。　

沽壓沉重　難破22元

網友天生股仔狂就認為：「中國嘅壽險市場啱啱先至發展，壽仔未來仲有大把上升空間，睇好佢嘅市值將來會超過AIG㖭！」而Toby88仍然覺得壽仔係一隻潛力無限嘅股票，係另一隻新華富時A50中國基金（2823），「只係怪自己之前買貴咗，不過算啦！等佢十年八載，都唔會太過擔心。」
國壽嘅股價踏入3月以來，一直在22元以下徘徊，最高只見21.9元，反映沽壓沉重，在黑色星期一股災當日，股價更曾低見18.42元。麥格理研究喺今個月9號，給國壽的評級為中性，目標價訂喺22元。