無綫姐仔徐淑敏（Suki）同葉翠翠，前晚竟然喺灣仔君悅酒店夜會馬國明同黃長興，四人疑似有景轟。好彩後尾殺出無綫高層樂易玲同陳佩華，先知道原來幾位藝員係被老細召見，同一班操普通話嘅片商斟大茶飯。
前晚10點零鐘，Suki同葉翠翠等齊齊現身酒店coffeeshop，同枱而坐嘅仲有藝員部同事同埋幾個男人，冇耐樂易玲同陳佩華到場，成班藝員即時讓位，轉坐另一張較大嘅枱，樂易玲就坐番原有張枱，同兩個男人傾生意。

揸37萬寶馬

現場見葉翠翠不時手舞足蹈，講得七情上面，反而Suki比較靜局，照推斷四位藝員應該同啲內地或台灣製作商見面，所以全程都係普通話世界。傾足一個鐘後，馬國明同葉翠翠就坐的士各自離開，徐淑敏就去停車場，揸住佢部落地三個月、售價37萬嘅黑色寶馬新車，載埋黃長興等一齊走。諗唔到拍劇量唔多嘅Suki，都可以以私人名義買靚車，唔知係咪佢位工程師中坑男友黃重生送畀佢嘅禮物呢？
其實無綫近年致力打開內地同台灣市場，不時同內地有合作拍劇，舊年無綫仲羅致咗台灣偶像賀軍翔，今次無綫安排啲姐仔同新紮小生見老細，唔通想交換人質拍劇？
此外，Suki、葉翠翠同陳敏之噚日現身中環7號碼頭出席美容產品活動，Suki以一襲白色低V連身裙搶晒風頭，連葉翠翠都話自己輸足九條街，佢話：「𠵱家着lowcut都有啲肉，如果着V，就輸足九條街，係自暴其短。」