當年今日
關於我們

  丁光訓坐輪椅搞統戰 陳日君不上釣 - 李八方

蘋果日報 2004/08/06 00:00


特首董建華前晚風塵僕僕,由廣州坐私人座駕趕返香港,原來係為咗要出席噚日喺灣仔會議展覽中心開幕嘅「中國教會《聖經》事工展」。
呢次破天荒首展都算巴閉,由政協副主席丁光訓帶隊,除咗介紹內地聖經嘅印製歷史,重有大批珍貴實物展覽,連一百一十年前送畀慈禧太后嘅同版製作嘅《君王版》聖經都攞埋出嚟慈善拍賣,為中大沙士研究籌款。
中央咁高調搞活動,梗係有目的而嚟,早前就送嚟佛教聖物舍利子,今次到基督教聖經寶物,下次講唔定出到張三丰秘笈,總之一句講晒,要大搞統戰工作,喺九月立法會投票前做得幾多得幾多,所以丁主教坐輪椅都要親自出馬。
呢位身穿紅衣、頭髮都白晒嘅紅衣主教喺開幕典禮上致辭上講得好動聽,話內地教會(官方嗰種)可以嚟香港舉行今次展覽,證明中國人民享有宗教信仰自由權利並唔係空話,又話內地五大宗教同本港六大宗教之間係冇怨恨嘅,有神論同無神論者都唔應該存在你死我活嘅關係。
empty
人權監察投訴柏聖文
聽佢咁講,八方就問主辦單位,有冇邀請天主教香港教區主教陳日君出席開幕禮呢?因為鄺廣傑大主教都有嚟主禮,中國基督教三自愛國運動委員會(官方教會)駐會副主席鄧福村牧師就話,係有嘅,重話曾經打過三次電話㖭,只不過陳主教唔得閒,但就答應咗會去展覽會睇睇。陳日君幾時都好有政治智慧,點會咁易上釣吖?不過,講過就會出現,反正個展覽到下周二先結束。
而丁主教亦唔心急,因為佢今次嚟成八日咁長,大把時間做統戰。
中共一出手就好全面,連本來好低調嘅外交官員一樣揚聲,楊文昌駐港一年,都寫番篇文章喺中英文報紙刊登,話就話講香港成功之道,最後都警告駐港使節唔好咁多事,干預香港事務,咁佢講邊幾個人係人都知。其實英國駐港總領事柏聖文已經學乖咗,前幾日喺一個午餐會上指大班同商台解約事件,表面睇嚟只係一宗勞資合約糾紛,佢不便多加評論,又話冇任何確切證據,顯示最近發生嘅一連串事件影響本港言論自由同新聞自由。
柏聖文早前高調批評北京釋法同否決雙普選,今次大班被壓迫卻忽然收聲,莫非佢嘅言論自由都受影響?香港人權監察睇唔過眼,就寫信畀英國首相貝理雅,投訴柏聖文咁講若果唔係對香港事務無知就係收錯料,否則就係刻意討好中國,人權監察話佢哋收到可靠資料,名嘴封咪同一名商人有關,呢位商人聲言代表國安部㖭。


傳真︰2623-9278
電郵︰[email protected]
empty
呢本有一百一十年歷史嘅《君王版》聖經最受注目。