銀行界競爭愈演愈烈，中小型銀行要突圍，就要用啲計，扭亁坤，好似廖烈文，雖然年紀唔細，但思想卻開放前衞，佢唔單止大膽將用咗差唔多60年嘅銀行名，刪咗個家族姓氏──廖字，吸納新客，兼且人棄我取，當獅子行呢啲大行唔吼屋邨客時，創興銀行就轉做街坊銀行，廖烈文去年5月仲親自落葵涌區視察，亦表示吓佢哋對屋邨客戶嘅重視。難怪華華聽聞，創興啲分行經常收到區議員嘅電話，做乜？催促佢哋快快開分店囉。
一向專注喺屋邨開舖嘅「創興銀行」，不但大受街坊客「垂青」，而且仲好得區議員嘅歡心。事關𠵱家肯做屋邨客生意嘅銀行寥寥無幾，大概只剩低中銀同創興兩家，創興曾經講過，佢哋喺領匯租到嘅部份舖位，以前租客係滙豐等大型銀行。由於屋邨愈嚟愈缺乏銀行設施，不時都聽到班區議員話，要幫班居民爭取銀行分行設施。

區議員日日催

華華噚日聽聞，創興喺東涌逸東邨逸東商場嘅分行、喺06年底正式開張前，不斷收到該區區議員嘅電話，追問佢哋究竟幾時可以開分行，議員催促佢哋張貼通告通知街坊㖭。咁事實證明佢哋係有客路嘅，創興話，逸東商場分行開業後，佢哋好受邨內嘅家庭歡迎。
創興𠵱家大約有16個舖位，喺領匯旗下屋邨商舖，佔整體分行數目近四成，佢哋計劃喺未來兩年，再開多8家分行，為咗貫徹佢哋嘅街坊路線發展策略，希望繼續喺領匯商場物色新舖，但要睇中地區同舖位至得，聽聞即使有啱心水嘅舖位，今年嘅租金都肯定會比06年高。