喺灣仔新伊館舉行嘅「繼續寵愛哥哥當年情群星音樂會」，噚晚（10號）就搞出個大頭佛，由於音樂會貨不對辦，觀眾撕海報﹑嗌退票，甚至報警求助，而其中一個表演環節名為「繼續寵愛哥哥當年情金曲再現」，所謂「神秘哥哥」，就係姓陳，藝名為飛龍嘅表演者，佢喺觀眾辦理退票手續時照出場，唱咗多首哥哥金曲，有指佢係香港表演學院有限公司嘅校長，亦係今次主辦搞手之一。

喺退票其間，有位中山人問道：「我贊助嗰三萬元有冇得退飛？」當記者再追問呢個人時，佢就突然急急腳走，又話：「我唔追啦」，但半小時之後，呢名男子又再蒲頭，佢話係飛龍哥邀請佢做贊助，呢個人又話已諗清楚，話會繼續支持飛龍，唔會要求退款云云。

至於「神秘哥哥」飛龍哥上台表演後，記者搵佢做訪問時，佢雞咁腳急閃入房，經記者再三追問下，飛龍無奈受訪，佢話：「自己係鍾意哥哥好多年，今次音樂會係紀念哥哥。」講到遭觀眾投訴話貨不對辦，佢解釋牽強：「可能宣傳時溝通有誤會，今次係群星演唱會，其中一Part係紀念哥哥，可能有啲人別有用心。」哇，點都得？

但觀眾真金白銀購票入場喎，唔通佢哋買飛入嚟搞事？飛龍即話：「唔係唔係﹗」係咪全票可以退款？佢話：「搵有關同事負責。」

講到贊助商要求退款三萬元，佢就好尷尬話：「我呢啲係小職員。」但有指佢係搞手及該學院校長，飛龍繼續解釋牽強，佢開頭話自己係導師，但再經追問下，佢有份做行政嘢，但始終冇承認係校長身份。

再問到今次係主辦搞手？佢強調：「自己係表演者。（但表演者聯絡贊助商？）幫下手囉。（今次搞到咁會否再搞？）有觀眾支持再搞。（但贊助商都唔支持？）若有人支持的話，就繼續支持哥哥。」