【新增回應】

出道於60年代嘅本地著名音樂人聶安達（Anders Nelsson），將會喺10月16號假文化中心舉行首次個人演唱會「I Love Hong Kong 演唱會」，今日Anders就喺灣仔舉行演唱會記招，獲露雲娜、周啟生及陳欣健等好友現身支持，其中露雲娜更稱Anders為「老竇」，足見感情深厚。

兩人接受訪問時，露雲娜表示：「我5歲參加歌唱比賽時，Anders就係評審，佢當時畀我滿分。」Anders就話：「露雲娜嘅父母都係好出色嘅音樂人，佢未出世我已經識佢父母，有搵佢哋合作。」兩人又表示，會喺演唱會上合唱露雲娜嘅成名作《荳芽夢》，露雲娜憶述當時歌曲係Anders作曲，林振強填詞，兩人喺好短時間內完成，亦成為經典。

Anders表示由於有太多經典歌，所以揀歌方面非常頭痛，同時為咗令演唱會更豐富，近來不斷喺屋企翻舊相，勾起好多回憶，佢仲大爆以前同露雲娜喺外地表演時嘅舊事，佢話：「我搵番張相當年同露雲娜喺南美洲智利出席歌唱比賽嘅相，當時同場仲有英國樂隊The Police，佢哋主音Sting好想『嗒』佢。」

露雲娜聞言即大叫：「哎呀，Sting好鹹濕，我當時得18歲，卜卜脆㗎！」Anders續說：「我當時係露雲娜經理人，一定要保護佢，所以同Sting講『She is under age』，不過嗰時佢哋個個都飲醉。」被往事引得大笑嘅露雲娜再三強調Sting「好鹹濕」，咁對方究竟做過啲咩？露雲娜唔肯講：「我唔講，總之佢好鹹濕。」

《蘋果》今日打番畀Anders，問露雲娜當年點被Sting鹹濕時，Anders話：「佢撲埋佢度話『give me a hug』，又攬又想錫，又叫Rowena入佢房一齊飲酒，我就拉開佢，我哋唔慣呢樣嘢，我要保護Rowena，我咪話Rowena under age唔可以囉！」

精選娛聞，喺晒《娛果》
http://fb.com/appledailyent