中渝置地（1224）喺內房股當中，超級大落後，抵搞。中渝最新NAV5.2元，現價（1.98元）大折讓61%。呢期好多內房特別係龍頭唔覺唔覺，已經創咗或貼住一年高位。就連之前推介過、又供過股嘅新中（917），亦創埋52周新高，中渝係無乜點郁，價殘兼大折讓，好吸引。再講，中渝手頭現金過67億銀，淨借款比率20%唔夠，手頭大把銀彈，冇有怕。中渝今年頭五個月，累售近27億銀，而上年尾還累積咗未確認嘅收入上百億銀，隨住呢批收入入賬，已經支持到中渝嚟緊成績單。嚟緊日子，只要阿爺一鬆手，中渝又可以享受另一轉水漲船高豐收期。呢期中渝兜緊個靚仔圓底，博上到量度目標2.8元，潛在回報率四成過外，目標價未有耐到NAV。

王朝現金牛短炒

王朝酒業（828）2011年度（12月底止）業績差，股價尋底。但集團現價跌到得番1.34元，貼近海嘯價之餘，兼跌穿埋NAV1.6元，少有。而集團手頭淨現金有4億銀，喺業績TurnAround前，現金牛兼輕微折讓，都有得唸吓。又加埋王朝呢期尋底，日線圖呈背馳，應該可以博轉技術性反彈。就以王朝NAV做目標，現價要升近20%，有魚有肉。

錢雋