「勇樣」裴勇俊有拖拍喇！今年41歲嘅俊哥，今日俾日本報章踢爆佢同一個細佢14年嘅大企業千金秘密撻着，俊哥嘅事務所亦大方承認戀情，話佢哋只係開始咗三個月。

據知俊哥幾個月前喺一個朋友聚會上邂逅咗呢位圈外有錢女，俊哥上個月28號仲拖埋女友飛去日本濕平，仲帶女友見朋友出席朋友嘅婚禮，而今個月4號返韓國時，佢哋就戴住黑色情侶帽掩人耳目。

俊哥現任女友有成1.7米咁高，同1.8米嘅俊哥好襯，亦因為女友喺美國住過一段長時間，所以英文流利。

俊哥嘅事務所話：「由於俊哥女友並非圈中人，所以唔方便公開進一步資料，而且佢哋啱啱拍拖，談婚論嫁未免太早吧。」

俊哥對上一次公開拍拖已是03年和現為MV導演嘅李思江，可惜翌年分手。俊哥憑韓劇《冬日戀曲》而爆紅成為師奶殺手，佢今日傳出拍拖消息，尤其震驚了日、韓兩地粉絲，有人話有啲傷心，但都祝福俊哥。