沙中綫會展站傳因挖掘工程工地支撐架不足，被勒令停工。資深土木工程師倪學仁指出，工程顧問設計工程時，一般會相對嚴謹，用較極端的數據作假設，定出放置支撐結構的標準。但不排除承建商在施工時，見工地的地下水位，土質狀況較預期理想，「偷雞」少放支撐架以縮減工期趕工，「原本設計挖到某一個深度就要放支撐架，但好有可能睇過都覺得安全，就偷雞放少啲，少一個程序可以做快啲」。

他質疑，少放支撐架肯定會被港鐵駐地盤人員察覺，「若果唔係紅磡站、土瓜灣站接連爆鑊。監工都好可能按工地狀況，隻眼開隻眼閉畀佢偷雞。」他指，目前承建商除需要按照圖則補回支撐架，亦需要對工地附近路面及地底設施做檢查，「因為承托泥土壓力嘅支撐少咗，附近泥土可能有郁動，嚴重嘅可能導致馬路裂開，同埋地底喉管容易爆裂」。

翻查政府物流處，涉事禮頓中國建築聯營公司，另承接其他大型基建工程，2016年就中標投得將軍澳藍田隧道的主隧道工程項目，合約價值高達87.31億元。中國建築亦有承接港珠澳大橋人工島基礎設施工程，以及西貢公路改善工程，過去興建的啟晴邨及紅磡邨二期公屋，則曾捲入鉛水風波。