樂基兒（Gaile）今日喺金鐘出席Tumi活動，Gaile啱啱同老公過咗結婚一周年紀念，問到Gaile點慶祝？佢話：「今年好近生日，冇特別慶祝，食咗飯，同先生去咗室內攀石。」 佢仲話同老公好多共同嘅興趣，大家都係運動型，佢哋鍾意做運動拍拖，之前喺美國露營同戶外瑜伽，佢又話啱啱學攀石，搞到手瘀腳瘀，但因為怕高所以就打橫下，遲啲希望可以挑戰去爬山。

問到Gaile有冇努力造人？佢就話努力嘗試中。提到前夫黎明嘅B女曝光，Gaile話：「嗰張冇睇，啱啱出世嗰張之前睇過，係記者畀我睇嘅，呢張我會睇返，一定好開心好得意。」問佢唔好奇BB似爸爸定媽媽？佢話：「冇乜所謂，之後我都有打畀Leon祝福佢，佢都有覆我thank you。似邊個都冇所謂，最緊要健康，因為都係兩個人嘅BB，開心就得。」

精選娛聞，喺晒《娛果》
http://fb.com/appledailyent