榮倉奈奈宣佈誕B 與賀來賢人榮升父母
榮倉奈奈賀來賢人
現年29歲嘅日本女星榮倉奈奈,透過事務所宣佈已於本周一喺東京一間醫院為27歲演員丈夫賀來賢人誕B,係兩人首個小朋友,但暫未有公開BB性別。
首度榮升父母嘅榮倉奈奈同賀來賢人分別透過事務所報喜,榮倉奈奈表示已經誕下5磅15安士嘅健康BB,好多謝各方嘅支持,尤其係一直陪伴在旁嘅丈夫。至於賀來賢人則表示對於家裏添新成員感到無比興奮,做咗爸爸亦感到自己多咗一份責任感。
榮倉奈奈同賀來賢人於2014年合作拍劇集《為了N》邂逅,去年8月突然宣佈婚訊,榮倉奈奈於今年3月公佈懷第一胎嘅消息,大住個肚拍完劇集《東京白日夢女》先停工養胎。
目前榮倉奈奈暫時會專心照顧BB,視乎身體狀況先考慮復工。至於賀來賢人就努力賺奶粉錢,佢將會接替因性醜聞被飛嘅小出惠介,演出新劇《曾經愛過,是有秘密的》。