跑過四次賽事，冠軍倉蔡約翰、告東尼患上季初病，尚未開齋，好幾個華籍馬房就搶得就搶，徐雨石次次贏馬以六Win彈出，馬場從來都是跟紅頂白之地，周六（16日）賽事要繼續跟進這類旺勢馬房。

徐廐今戰出12駒大堆頭，當中三、四、七場出馬多過一匹，邊隻旨在遊馬河？邊隻才是真命天子？馬迷當然要識分，第七場二班1000直路盃賽場合，橫看豎看「歷險家」應是馬房主力，廐侶「藍天堡馬」及「精益大使」只係陪太子讀書。

報名公佈時已察覺，這組草地賽有着不少泥地馬，包括「藍天堡馬」、「公証揚鳴」、「花月流星」等，「牛精叻仔」連同延遲報名加入「陀飛輪」則是典型谷草馬，戥腳味道極濃。

雖然出馬滿額足14匹，惟真正具競爭力的一隻手數得晒。「歷險家」1000直路係死路程，此程14戰獲四冠三亞半數入Q，速度型馬跑啖火，好起上嚟「宇宙車神」、「世澤之星」都追佢唔到。

上季中唞過至五月復出，亦只不敵季內五Win、銳得交關的「喜悅繽紛」，可將「歷險家」定位為好使好用的二班馬。

「歷險家」今季四轉五歲未必再進，現時評92分，相信仍有一W在手，季初趁對手狀態各有不足，以快打慢，應是爭功的黃金機會，執埋10檔確保可貼欄高速領放，大有機會為徐廐再添一功。