陳曉東近年逐步復出樂壇，並將會喺7月28日喺台北南港展覽館舉辦「陳曉東 PLANET XT」世界巡迴演唱會。近日佢就推出新歌《女人都差不多》，用嚟獻俾現實中3個最愛嘅女人，佢仲話：「主要想跟大家說，感恩母愛真偉大。」

不過，成件事最大焦點，放咗喺阿東個MV中，劇情安排佢同MV女主角飾演情侶，攬攬錫錫梗有啲，除咗有熊抱，仲有碌床！

問阿東有冇同老婆王妤嫻預先「備案」？阿東話：「唔使報備啦，無論報唔報備，MV都要拍，老婆都明白我都係為咗做嘢，我哋之間嘅相處唔會因為冇報備呎件事而嬲，我哋冇咁幼稚。」不過佢坦言老婆睇完之後有啲呷醋，佢話：「我拍完之後俾咗佢睇，佢『哼』咗一聲，不過後來就冇事。」

提到阿東一直被打造情深款款嘅形象，好似係個浪漫型男人，但佢話自己其實係實際派，佢話：「大家都誤會我喇，我其實唔係浪漫派嘅人，我老婆反而比較識點樣花小心思製造浪漫。」阿東又話自己好少唱情歌俾老婆聽，反而會講老婆最啱聽嘅肉麻情話，佢都好努力學緊點樣去冧老婆。

精選娛聞，喺晒《娛果》
http://fb.com/appledailyent