今早（13日）晨課場面尚算熱鬧，外籍騎師中，除了潘頓、杜利萊與及正值停賽之祈普敦外，其餘均有露面操馬，始終家陣競爭激烈，大家都想爭取更多支持。

動態最特別係史卓豐、柏寶及李寶利，三人今早到場都只係操了一隻馬就收工，而且所操馬匹都已報跑本周六（16日）賽事，明顯見到心中有馬。

其中史卓豐獨替高伯新馬房之「無限欣賞」操練，在大圈快跳兩段，呢隻馬一次配史卓豐上陣即勝，反而由其他騎師跑從未上名，今仗回配史卓豐，難得騎者咁重視，值得優先留意。

另外，柏寶及李寶利分別獨操「阿姆利則」及「仁者荃心」，前駒在開鑼日（3日）初配柏寶即獲亞軍，後駒上季跑兩仗都輸得唔遠，配合今早動態，已露搏殺手影。