已故富商何東爵士孫兒何鴻毅，獲加拿大總督Julie Payette頒授加拿大勳章，表揚佢對加國醫療機構同學府所作嘅貢獻。呢次有103位人士獲授加拿大勳章，而何鴻毅就係86個獲頒授員佐勳章（C.M.）嘅人士之一。

加拿大勳章喺1967年開始頒授，係政府頒畀加拿大公民嘅最高榮譽之一，以表揚為社群服務、為社會帶嚟正面影響、以創意啓發他人同以慈愛凝聚社會嘅國民。原來至今約有7,000位嚟自唔同社會崗位嘅人先後獲頒加拿大勳章，而何鴻毅就因為熱心公益，致力喺醫療、教育、佛教同中華文化四大範疇，透過慈善工作改善加國市民嘅身體以及精神健康等而喺今次榜上有名。

移民加國多年嘅何鴻毅回應指，對獲頒勳章感到榮幸，希望藉住參與同支持社群服務，令加國變得更好；作為熱心公益慈善嘅人，佢話時刻堅守祖父家訓：「懂得施，方能受！」。