馬國明和黃心穎被本報踢爆在又一城拍拖睇戲之後，一段開始發酵的感情，迅速浮上水面，異口同聲表示了解中的密友，轉眼就有機會一齊出席活動搵真銀。昨日二人以情侶檔身份出席尖沙嘴The ONE「夢幻時光遊樂園」揭幕禮，一對緋聞情侶被擺上枱，馬國明和黃心穎一開始表現緊張，後來兩個人之間的距離拉得越來越近。大會安排二人用棉花做手工，做一對卡通狗耳朵，馬國明和心穎BB互相幫對方戴上棉花耳仔，棉花散落在馬國明身上，心穎即刻細心為對方整理。

接受無飯女友

現場心穎大展歌喉，唱了一首《勇氣》，莫非是要向慢熱的馬國明表白？但馬國明唱《友情歲月》作回應，心穎即刻為馬國明解圍，她說：「佢成日唱，冇時間練歌。」問馬國明聽不聽到心穎「愛的表白」，他即刻尷尬扮儍說：「我啲國語好差。」然後續說：「原本我係邀請心穎合唱一首我主唱嘅電視主題曲《心暖》，點知佢話冇聽過，我塊面都唔知去咗邊。」
上次被撞破後，馬國明和黃心穎都未有時間再約會，馬國明說：「要了解一個女生不外乎逛街、吃飯。」黃心穎指自己不識煮飯，馬國明和應指不介意未來另一半不會烹飪，只要自己喜歡就可以。
採訪：盧妹　
攝影：沈健程