繼日前銀建（171）、中航興業（1110）及騰訊（700）遭連環斬倉後，噚日又有萬裕國際（894）被斬倉急跌21.7%。
唔知係劊子手斬得斯文，定係萬裕本身有一定實力？阿虎見到有投資者趁低接貨。此外，近期被斬倉的股份，股價跌幅普遍兩三成左右，與以往斬倉輕則唔見四五成，重則蒸發市值八九成的情況比較，算是小巫見大巫。
黑客話，證券行已經學精咗，一般冇實質業務支持的股仔根本冇得做孖展，有實力的股份頂多做40-50%孖展，一旦斬倉會吸引投資者趁低接貨，證券行較易取回孖展貸款本金。
華多利（1139）最近搞股份合併，10股合為1股，原因是股價已經接近1仙水平，所以按例需要併股。該股噚日跌12%至0.022元，合併後股價將變成0.22元，下跌空間變相大咗，傷上加傷。華多利於9月下旬曾先舊後新配售2.15億股，每股0.035元，集資752.5萬元，其後股價踢高至0.06-0.07元水平就有人開始派貨，相信大戶早已甩身，但當時在市場高位接貨的股民就喊得一句句。