香港地做飲食業艱難，但有些餐廳很夠膽。
不賣靚裝、不賣名廚，兼且不就腳。仍然照樣做生意，而且人氣旺盛，愈做愈好。像金潮，開在葵芳邨附近一個屋苑商場內，地點隱蔽，但開業多年，晚晚勁多人排隊，一到周末假期更墟冚，晚上六點來到已經好多人等位，平均要等上大半小時，趕時間別來。
這年頭，還可以叫人心甘命抵，專誠繞道前往，還要花點腳骨力去等的食肆，一定有必殺絕技。
金潮兩道殺着是：食物有水準。價錢又公道。
菜式以家庭小炒為主，近百款選擇，鮮魚皮、黃金蝦、南乳炸碎雞、砵酒桶蠔、胡椒蜆湯，雖然是普通小炒，但勝在用料新鮮鑊氣夠，炒出來熱辣辣香噴噴。
價錢又平，但分量大到飛起，最好不要兩個人來，否則叫兩個菜式已經飽到上心口。能夠長期保持水準，因為店子由一家人經營，合作無間。
陳生負責管理、陳太和女兒兼顧樓面，兒子則負責買料和入廚，話晒是屋企生意，人人多走一步，特別落力。
這店不只是街坊飯堂，就連明星也專程來捧場，看看店內合照，便找到周慧敏、伍詠薇、周汶琦……有實力再加明星效應，才是人氣不跌的原因。

金潮小廚
地址：葵芳榮芳路9號恆景花園商場C02.14-15鋪地下
電話：26100488
營業時間：11am-2am
詳情： http://bit.ly/2KhZ2Kz

立即免費下載《飲食男女》App ： http://onelink.to/etwapp
《飲食男女》網站 ： http://etw.hk