27歲嘅大馬女神林明禎，今日就嚟到《蘋果》娛樂Facebook專頁《娛果》進行直播，同大家傾吓偈，難得嚟到香港，一開始嘅時候，明禎就用廣東話同大家打招呼，聽落都有下過吓苦功喎，話晒廣東話都唔易學㗎。

不過始終都唔係以廣東話作為母語，所以明禎自己都話有啲時候都好驚自己讀唔啱音，仲好擔心大家會聽唔明，不過講就難啫，聽會易啲嘅，所以明禎都話自己聽廣東話基本上冇乜大問題，自言好勝嘅佢仲挑戰廣東話急口令，勉強都叫做合格啦。

玩完急口令，明禎今次就挑戰唱廣東話歌，帶嚟電影《救殭清道夫》嘅主題曲《長相廝守》，明禎仲透露當時錄音嘅時候，ToNick帶埋成隊人去到台北同佢錄音，更加一隻字一隻字教佢唱，佢自己仲用英文拼音寫歌詞死記硬背，對佢廣東話嘅功力有好大幫助。

明禎嘅性格相對爽朗，主持問到拍電影飾演打女嘅經歷時，明禎仲鬼馬咁問主持使唔使試下佢嘅拳腳，講到要練習做打女，明禎就話自己非常好勝，如果覺得做得唔夠好就會一直練，仲試過受傷令到韌帶撕裂，但係都頂硬上著住高踭鞋拍戲，仲用類固醇止痛，仲話搞到腳趾都凹咗。

講到拍拖，明禎就話自己未試過主動追求男性，不過如果現時遇到鍾意嘅男仔會諗方法令對方知道，同男朋友相處嘅時候，明禎話自己唔會小鳥依人，反而會好似好兄弟咁直來直去，相當爽直。

講到12月29號會喺香港有第一場演唱會同見面會，海報上更有五個唔同嘅造型，明禎話其實係代表緊內心唔同嘅自己，分裂成五個佢喺海報上，仲話有神秘第六造型未出場，話晒都係第一次喺香港搞演唱會，明禎就講到明會有香港嘉賓出席，不過因為要保持神秘唔講得，但係就透露係一位曾經合作過嘅香港藝人，仲話上次喺香港搞簽唱會時喺戶外，結果落大雨令Fans成身濕晒好心痛，所以今次會喺戶內舉辦。

場地：RedMR紅人派對

更多娛聞，喺晒《娛果》
http://fb.com/appledailyent