當年今日
關於我們

狗娛坊:小儀 人不愛狗 我不愛人

蘋果日報 2009/07/11 00:00


「你是否願意無論艱苦、貧窮、疾病,都愛他一生一世?」這句不只是結婚的誓詞,其實當你決定養一隻寵物時,請你先想想自己能否做到一生一世的承諾。作為一個愛狗之人,小儀自問一定做到以上的承諾,最近她以愛犬DeeDee為題材出書,她又計劃推出一本書講述無良心的主人,如何千方百計遺棄寵物,以另一種手法警惕所有人養動物前要三思。
撰文:李珮洳
小儀與愛犬DeeDee相處了5年,感情有增無減,她以前從沒想過要養狗,當初對狗感興趣都是因做電台節目,她說:「好耐之前有個節目叫《小儀擺尾》,係講一啲養狗貼士同知識,咁我又識一個朋友係賣狗嘅,有日佢打畀我話,話有隻芝娃娃好得意,叫我去睇吓,我一見到DeeDee真係愛不釋手,就係咁同狗仔結下一個不解之緣。」
上堂教愛犬公德心
作為主人,小儀看了不少有關養狗的書籍,更親自上堂訓練DeeDee做不同動作。訪問當日,小儀只是用了一盒小小的食物,便引導DeeDee做出不同動作,默契十足。小儀又希望為小狗平反,她認真地說:「好多人都話細狗例如芝娃娃、松鼠狗好嘈,成日吠又唔聽話,其實呢啲係好睇個主人有冇教導佢。DeeDee從來唔吠,呢啲係家教,我為咗教育佢專登上堂,再返屋企訓練佢。因為我覺得人要有公德心之外,狗亦都要有,咁先至會做到一隻受歡迎嘅狗仔。」
小儀有時因工作關係,會帶DeeDee出席公開活動,所以她的fans也會愛屋及烏,故此小儀希望與DeeDee一同做善事幫助有需要的人,今次推出名為《DeeGreeofLove》的圖片散文集,部份收入捐給香港愛護動物協會(SPCA),她說:「其實我一直都想出一本講狗嘅書,但市面上太多養狗知識嘅書,諗咗幾年我又冇再諗呢件事,直至森美同我講不如出一本用狗做第一身,講關於追女仔嘅書啦。俾森美提一提之後,我覺得呢個題目幾有趣,好似好多時啲狗仔等開飯,都要主人一聲order先可以埋去食,佢哋一定要有耐性,追女仔都一樣要有耐性,先食到好嘢。」
empty
DeeDee用口扯走小儀頭上毛巾,十分搞笑。
empty
DeeDee經常跟主人亮相,3月時小儀(右)便帶着愛犬,與朱薰一起參加愛護動物協會的慈善活動。
資料圖片
斥無良主人棄寵物
推出第一本以狗為題材的書,小儀打算再為小動物做點事,因為她發現有太多無良主人遺棄寵物,她希望以另一個角色警惕人們養小動物要先想清楚,她說:「每次我聽到有小動物俾人遺棄,我又心痛又嬲,我有個女性朋友養開隻狗,之後佢周圍問有冇人要,佢唔要嘅原因係佢男朋友唔鍾意隻狗。我聽到真係好嬲,佢養隻狗在先,識咗個男仔之後就話唔要,呢啲人好唔負責任,我對呢個朋友扣晒分。」
小儀又謂有狗主逃避照顧年老的狗隻,帶牠們到寵物店聲稱要洗澡,存心留下假電話號碼,之後一走了之。小儀感慨地說:「市面上有好多書講啲主人同寵物十幾年相處嘅生活,呢啲故事好感人,帶出人同動物之間嘅關係。不過我好想寫一本書係講啲衰人點樣唔理自己嘅小動物,我好想同想養小動物嘅人講,由第一日你帶佢返屋企,佢哋就係你嘅家人,你唔可以因為任何一個原因而唔要佢哋,我希望呢本書可以警醒呢啲無良心嘅人,同埋話畀想養動物嘅人知要有責任心,呢本書我希望幫遺棄動物協會籌款。」
empty
小儀希望出書幫助不同的動物團體,她更要警惕大家不要遺棄寵物。
DeeDee恐怖吃便便
很多養狗的人講及寵物的惡行,大多是咬爛家中物件,或是隨處大小便。小儀表示DeeDee做過最恐怖的,是小時候吃掉自己的大便,她說:「唔知點解好多狗都會食番自己嘅便便,我覺得DeeDee係有潔癖㗎,所以佢唔想見到啲屎,大個咗之後佢冇再咁做啦。」
小儀給DeeDee的評分甚高,她說:「如果10分係滿分,DeeDee乖嘅程度都有9.5分,因為佢從來冇咬爛屋企任何一件物件,而且佢好長情,有一個玩具玩足5年都未咬爛,每日都要玩一玩先安樂。」不過DeeDee有一個壞習慣是改不掉的,小儀說:「雖然佢已經絕咗育,但係佢都有『un』公仔嘅習慣,佢un兩吓就會走開,從來唔會un人隻腳,咁呢啲係動物原始慾望,我又唔會去阻止佢嘅。」訪問當日發現DeeDee的舌頭經常伸出來,小儀說:「由於兩隻牙唔齊就合唔埋,於是閘唔住條脷,搞到成條脷伸咗出嚟,醫生話只係會成日口乾。」
empty
小儀多年來訓練DeeDee做出不同動作。