周渝民（仔仔）與太太喻虹淵結婚就嚟三年，婚姻美滿，不過喻虹淵自今年9月初起，受到一個好嚴重嘅問題困擾－－網絡欺凌，今日佢終於忍唔住，喺facebook發貼出律師信，指個多月嚟受到十幾個用戶以相似嘅用字惡意攻擊。

喻虹淵facebook上撰文，表示「沒有任何人（即使是公眾人物）應該受到惡意或無謂的人身攻擊及公開的言語污辱，甚至是語帶威脅的留言騷擾。」

今次事件只係得佢一個受害者，但網絡欺凌呢個問題，一直都存在，而且唔係少數。喻虹淵又指呢種惡意攻擊，係一種確實存在、但又刻意隱藏嘅暴行，對受害人而言係精神折磨，甚至會成為壓倒駱駝的最後一根稻草。

面對呢啲惡意攻擊，喻虹淵試過留言勸告當事人，亦試過檢舉，最後索性唔理，但反而助長咗加害者嘅氣燄。喻虹淵甚至有諗過，係咪有人藉呢種騷擾行為發出求救訊號。

最後喻虹淵選擇報警，但欺凌者卻變本加厲，喻虹淵呼籲社交平台公司：「應該更有效率地去管理社群平台的使用帳號，也必須有更完整而嚴謹的規範去約束某些濫用或利用網路犯罪的人和事情頻繁地發生。」

喻虹淵又話個人好惡係主觀嘅，任何人可以表達「喜歡你／不喜歡你」呢種概念，但呢種行為同「留下充滿人身攻擊的言語，公然侮辱毀謗，長時間密集地騷擾」有分別，重申「#拒絕網路霸凌」，又表示採取法律行動，今後唔會再對此事公開回應。

呢頭講完，就有一位律師信中有提及嘅facebook用戶洗版留言「我一點都不怕你，為什麼我要怕你？白癡！」

相關報道：
【咁林志玲呢？】日本公開認愛？言承旭：感謝女朋友陪伴
https://bit.ly/2CqIjVk