娥特林鄭月娥雖然聖誕節北上去咗桂林共聚天倫，但經常喺Facebook貼文報告行蹤，加上唔少傳媒輪流播出佢嘅訪問，好似成個聖誕無離開過。

今次娥特商台嘅錄音節目訪問中透露，自細已對每件事力求完美，勤奮學習，但屋企人冇咩畀壓力佢，而佢小時已經好獨立，何以見得？因為6、7歲會獨自去戲院睇戲，曾經去過環球戲院睇陳寶珠主演嘅戲。

今年升呢做特首嘅佢話喎，辭任政務司司長時好大掙扎，因為當時已經準備退休，想多啲時間同家人相聚，而決定入閘跑馬仔亦經歷情緒波動，覺得對老公林兆波唔多公道，因為傳媒會關注特首另一半，可能對佢有大影響，又透露5年前已經喺英國買屋，希望同老公過退休生活同陪囝囝，決定參選後已經放售物業。