日本組合AKB48前成員板野友美，離咗隊已經有兩年幾，AKB上個月剛滿咗10周年，而AKB出身嘅板野亦都係剛剛入咗行10周年，噚日佢就喺東京赤坂舉行入行10周年紀念活動，同粉絲一齊慶祝，點知大會竟然大整蠱，搵隻鬼嚟嚇到板野花容失色，仲逃走去到後台。

其實板野主演嘅恐怖電影《偷窺眼》4月會喺日本上影，噚日佢進行緊10周年活動時，大會就安排咗偷窺鬼上去獻花，點知隻偷窺鬼個樣太過恐怖，當佢突然現身台上時，板野立即嚇到走晒樣，仲向後台逃走，場面搞笑。到咗冷靜落嚟之後，佢先至敢行埋去偷窺鬼身邊合照。而板野最近仲參與AKB嘅10周年紀念單曲錄音。