【新增動新聞】
今屆洲際國家盃主角，未必係主辦國俄羅斯、2014世界盃盟主德國，甚至唔係葡萄牙球星基斯坦奴朗拿度，而係視像裁判（VAR）技術，尤其是佢喺周日再度「搶fo」！喺德國3:1擊敗喀麥隆嘅B組最後一輪分組賽，64分鐘喀麥隆守將馬保卡被指同安利簡恩爭搶皮球時舉腳過高，球證路丹（Wilmar Roldan）本來出示黃牌，後來徵詢VAR後決定改判紅牌，點知錯派畀另一喀麥隆球員施亞尼，後來再經VAR修正後先將馬保卡驅逐出場，雖然總算知錯能改，但難免成為網民笑柄。

喀麥隆教練布魯斯賽後依然怒火中燒：「我諗每個人都好困惑，就算我都係。我唔知發生咩事，首先係黃牌，跟住係紅牌畀咗第二個球員。唔好問我發生咩事！當時唔明白，而家都唔明白，球證亦冇作出任何解釋。」連德國教練路維賽後都有嘢講：「我同簡恩傾過，佢唔認為呢個係犯規，我亦唔認為馬保卡有意圖傷害對手，只係不幸事件發生咗。喺使用VAR嘅層面上，我哋的確需要適應，但起碼佢喺部份情況證明咗有用，例如入球越位與否；當然，佢需要作出微諮，令判決可以更快執行。」