出道10年的許廷鏗，昨晚在紅館舉行演唱會，父母、哥哥都有捧場。首次在紅館開騷的他，在台上表示：「多謝大家，今次係我第一次開四面台嘅紅館，等我感受吓四面台嘅震撼，頭先大家有冇留意我啲畫作、小朋友嘅相？我呢啲衫都有我啲畫作，全身都係唔同時候畫嘅畫，其實我的志願係做漫畫家，估唔到想做漫畫家呢個靚仔竟然今日可以喺紅館唱歌畀大家聽。」

在獻唱《體操》時，兩位女舞蹈員替他除下黃色外套。唱到《護航》時，許廷鏗看到台下的胡鴻鈞準備起身跟他握手，許廷鏗笑問：「你又點呀？」之後跟胡鴻鈞玩自拍，胡鴻鈞更唱了幾句。

表演嘉賓方面，許廷鏗先請來林欣彤合唱《忍》，接着，王灝兒（JW）出場拖着許廷鏗合唱《矛盾》時，他一時感觸哭了出來，JW亦受他影響，幸好二人立即調整情緒，繼續唱歌，唱完後，許廷鏗說：「我同JW喺中學年代已經認識，我哋係玩唱歌比賽大，我哋傻吓傻吓，只係鍾意唱歌，大大小小嘅舞台都表演過，而今日嚟到咁緊要嘅舞台，我好想同佢哋一齊分享，我從來唔覺得一個人要去成全自己先叫成功，因為呢啲經歷，如果冇身邊嘅人同你一齊係唔會有意義，我覺得今日好有價值，希望大家都會諗起，你自己心目中最想分享嘅一位朋友，我最想就係同呢班朋友分享呢個舞台，佢保護我多過保護佢自己，佢錫我多過錫佢自己，佢會將所有嘢都分享畀我（講到喊），我好開心，佢仲更加開心，我唔開心，佢會更加嬲，如果你好似我咁幸運遇到咁樣嘅一個人，請好好捉住佢，同埋大大聲咁話佢知『你喺我心目中係好緊要㗎！』」此時，正準備升上舞台的鄭欣宜已經哭着出場，邊喊邊唱《女神》，最後，林欣彤和JW再登場，與他們一起合唱《十年約會》及《青春頌》。

安歌時，許廷鏗請來謝安琪合唱《我歌故我在》，謝安琪表示唱第一粒音已經想喊：「好感動呀！」許廷鏗透露在港大時已認識：「我記得參加唱歌比賽時，你做表演嘉賓，我冇諗過有一日可以同表演嘉賓同台唱歌，所以我好多謝你。」謝安琪表示：「我哋有好多嘢都好投契，你有時好憂鬱，有時又好正能量，我覺得有好多嘢同你好似，我見到你遇到一啲嘢嘅時候，已經諗到你有咩感受，好驚呀，驚唔驚我係通靈㗎！」最後許廷鏗以《神奇之旅》作結，但由於歌迷不肯離場，許廷鏗只好再上台，唱多首歌就結束演唱會。

受訪時，許廷鏗笑言這個「初夜」的感覺好好。提到他弄喊JW和欣宜，他說：「我哋都覺得呢part喊硬，綵排嘅時候，我都有喊，我心目中一直有個紅館畫面，希望可以同我最close嘅人分享，佢哋3個係唔同階段，JW係中學時期，未入行嘅，Mag（林欣彤）係巨聲時期，都未係真正歌手，入咗行出唱片就係欣宜，呢3個算係最交心。」笑問哪個是「大婆」？他笑指：「我要講欣宜係大婆，Mag同JW一定明，你信我吖！」

談及好友張栢芝來支持睇騷（新聞連結： https://bit.ly/2TsBzLx ），許廷鏗說：「栢芝係自己話嚟，因為佢一直以嚟都有聽我啲歌。」問他為何不邀請張栢芝上台？他即說：「嘩，好難喎，我覺得要多謝佢哋嘅支持，最好回報就係用呢個紅館騷。」笑問張栢芝有沒有找他整牙？他笑說：「唔會啦！我都有講嘅，有咩需要即管開聲。」

為了演唱會，許廷鏗做運動瘦身，不過最後都未有騷肌，他笑說：「其實係有條坑嘅，我請得謝安琪嚟，同佢老公好大對比就唔好啦，而家做健身，個個都6嚿、8嚿，我得4嚿，我覺得未夠好，我哋期待下一次！」對於胡鴻鈞坐第一行，許廷鏗立即解畫：「隔籬係釗峰呀，你哋唔好玩我啦，啲位唔係我分配㗎！」提到今次沒有邀請胡鴻鈞上台，許廷鏗說：「下一次啦，點答呢？『初夜』梗係唔畀佢啦！」

此外，早前有指他在希雲街通宵會女友（新聞連結： https://bit.ly/2Wj0qDe ），許廷鏗澄清：「希雲街係我開工嘅地方，係工作室，我開會㗎咋，（過夜？）我哋噚日都過夜啦，噚日做嘢都做到4點幾，呢排成日都係咁，所以大家唔介意，如果有興趣搵我，就去希雲街。」追問現時有沒有拍拖？他即說：「冇呀，你覺得開紅館仲有時間拍拖？」

《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw

星期一至五晚上10點半
《動腦Q》Let's Q the money！
http://bit.ly/2QW8LcI