陳復生、葉家寶今日喺九龍塘出席「上海歌舞團《朱䴉》載譽回歸二十周年演出」記者會，呢套劇將會喺下個月28、29日假演藝學院舉行。陳復生表示《朱》劇曾經喺北京、上海、日本等地演出過，明年亦都會喺俄羅斯同美國演出，佢話：「除咗欣賞舞蹈藝術美之外，背後仲帶出環保訊息，朱䴉係中國嘅吉祥之鳥，而日本皇室亦視為神鳥，不過朱䴉因爲污染而頻臨絕種，所以呢個劇團想帶出人與人、人與大自然嘅共融。」邀請劇團今次來港演出，保守估計需花大約5、600萬，但幸好有其母以及不少單位出錢出力支持。

對於有指陳復生投資100萬製作120集有關中藥嘅資訊節目《世說本草》，係因為佢收到前夫何東舜銘支付嘅1.2億贍養費，陳復生表示未收到贍養費，就算今次活動，都係由其母出錢支持，佢話：「對方（何東舜銘）向終審法院申請上訴，o依家未有決定，未完結，交咗俾律師處理。」問到官司有冇影響心情？佢話：「我完全冇影響心情，因為已經係生活嘅一部份。」