今年個樓市好似食咗豬油糕咁，滯到飛起，網友eereel早排就喺《香港討論區》問吓大家對07年樓價走勢點睇，佢就叫大家記住「升升跌跌跌跌升升」呢個口訣，仲話狹義講，單位係season，廣義講係year。而回應嘅網友唔少都唔係咁睇好個市，好似CHATTER話：「nola，itmustbe跌跌跌跌跌跌跌跌...noonebelieveina升market，eventhepriceisrising。」IVAN1992323仲直接，連續「跌跌跌跌跌跌跌跌跌跌跌跌」12個跌字概括咗佢嘅睇法。kingcord就諗到奧運效應，不過佢提出「87年全球股災，97金融風暴，就算08有個奧運頂一頂，熱潮一過又可以大跌。」
上面個話題呢幾日可惜冇繼續落去，但呢兩日撞啱銀行減息，有網友轉軚之外，更搞咗個「樓市暴升支持區」，wattie話：「任總預期減savinginterestrate，投資人會重投樓市。」mawanppl即刻好興奮：「暴升暴跌先至好玩.....好似𠵱家咁好悶呀！」

期待玩接火棒遊戲

甲乙丙丁戌好似忘情上晒腦咁，「支持樓市暴升，仲要升到有泡沫爆破情況，好似97金融風暴時咁，就可以重新再玩接火棒遊戲，另一個樓市神話或股海神話人物將會橫空出現！期待，期待…………」
其實，個市將來點走，每個人自己都有個水晶球。最主要衡量自己有冇能力可以供樓供得好輕鬆，仲有樣嘢大家留意，𠵱家發展商賣新樓就貴過二手，入伙前後就會減到同二手睇齊，因此，幾時至買得過，大家或者都心裏有數。