當年今日

青心直說:強勢股高下立見 - 胡孟青

蘋果日報 2009/10/05 00:00


上周五港股插水式下跌,春江鴨打賭美國就業數據唔止「濕熱」,直頭「濕滯」,果然失業率再創新高。翻開中外報紙,全球市場彷彿如夢初醒,分析師重新評估經濟情況後,發現盈利預測過份樂觀,有機會修訂,大戶爭相跳車,這次裂口特別深,可謂插到內傷,連20600的支持位亦告失守,撈底博反彈走避不及隨時變「淆底」。
失業數據一向是數字遊戲,早前申領失業救濟的人數減少,純粹因為好多人領取救濟金已超過法定上限,被迫「退下火線」不再獲救助,勞工市場仍在ICU吊鹽水,消費又會好得去邊?
與其坐食山崩,不如接受現實重新出發,美國Mattel玩具公司率先放下身段,將新推出的GwenThompson金髮洋娃娃改頭換面,大玩「可憐天下父母心」。話說小Gwen身世悲慘,得幾歲人仔,爸爸被炒,無面目見人離家出走,剩低佢兩母女相依為命,連屋都無得住,惟有將架車駛去餐廳附近過夜,方便第二朝起身借廁所洗面刷牙。
娃娃也瞓街 Mattel變陣叻
咁可憐嘅身世,都係博有好心人以95美金將佢「收養」返屋企,仲可以用20美元買間Salon幫佢整頭,等佢重拾正常美國人消費模式,Mattel話可以培養小朋友對社會的認知及同情心喎。同樣係Mattel出品,50年前面世嘅Barbie洋娃娃完全係食飽無憂米,讀名校揸名車,仲有驕人身材同浪漫愛情,Gwen可謂揀錯時辰出世。
這個可愛窮娃娃一出世就引來批評指Mattel發國難財,等同美化無家可歸的慘況,話玩具公司冇同情心,因為件玩具純牟利,一個仙都冇用嚟做慈善。發國難財的確抵鬧,但值得欣賞係公司嘅靈活應變,又睇睇呢鋪係咪真係可以化危為機。
現實終歸現實,正如股神畢菲特話齋,當潮退後至會見到誰人在裸泳。呢輪潮退潮漲中,重磅藍籌股中移動(941)同港交所(388)嘅比堅尼泳衣明顯唔啱身,一嘢就冲走咗;反而大笨象嘅大大件一件頭,係就係老套啲,但勝在穩陣;仲有騰訊(700)嘅迷彩DeepV,當人人裂口急跌,佢仲可以黑馬姿態輕鬆弄潮,強勢股高下立見。
胡孟青