萬邦投資(158)除咗派息好,管理層對小股東十分唔錯,好有人情味,每年舉行股東會都會請小股東食餐勁,唔係一般上市公司向小股東派盒點心拼盤咁簡單,而係包起幾圍,成枱點心任食,仲有埋盆菜。
唔少上市公司喺五星級酒店舉行股東會,小股東開完會就可以食到酒店提供嘅中西美點,好耐之前,就因為有小股東帶齊膠袋、飯盒,大碟大碟咁打包拎走,搞到食物唔夠分,所以呢幾年上市公司索性叫酒店做好一盒盒點心拼盤畀小股東帶走。
好似萬邦咁樣,請班小股東喺中環翠亨邨坐低慢慢食嘅上市公司越來越少。萬邦今年同往年一樣,夠晒好招呼,除咗各式點心、燻元啼,就連盆菜都有,現場大約開咗六圍,招呼大約五、六十名小股東。