最阻手阻腳之事，莫過於上飛機唔准攜帶手提行李、液體更加嚴禁。最近睇到一段外電報道，話美國、歐洲方面已研究一種掃描系統，所有乘客帶上機嘅液體都要掃描，輸入電腦，電腦分析所有物體如果混合起來，會產生甚麼危險物品。舉例而言，行第一嘅乘客有香水、香口膠；排第五十一名嘅乘客帶咗粉末、gel、iPod，兩個乘客嘅物件混合起來，可以製造液體炸藥兼引爆物件嘅話，安全人員就會將第一名乘客與第五十一名乘客嘅手提行李扣查，另外擺開，落機時先至發還。
咁嘅科技，重未研究成功，假設係掂嘅話，將來我哋到機場即使提早三個鐘頭去排隊check-in檢查，都唔知趕唔趕得切。恐怖分子嘅捨命襲擊，某一程度上已成功地破壞咗人類嘅旅行自由，為各國機場，航機增加咗大量成本，降低咗地球嘅經濟增長率，更嚴重嘅係逼使政府侵蝕人民自由人權，為了保護你的安全，政府隨時可以截聽、監視。長此下去，《一九八四》寓言變成真實。